Averroes [Ibn Rušd]

Quoted text(s)

• F. S. CRAWFORD ed., Averrois Cordubensis Commentarium magnum in Aristotelis De Anima libros, The Mediaeval Academy of America, Cambridge, Massachusetts 1953., L. I, text. comm. 8, p. 12.21-43
  Deinde dixit: Vivum autem universale, etc. Demonstratur per hoc quod ipse non opinatur quod diffinitiones generum et specierum sunt diffinitiones rerum universalium existentium extra animam; sed sunt diffinitiones rerum particularium extra intellectum, sed intellectus est qui agit in eis universalitatem. Et quasi dicit: et non attribuitur esse diffinitionum speciebus et generibus, ita quod ille res universales sint existentes extra intellectum. Vivum enim universale aut nichil est omnino, aut esse eius est posterius ab esse rerum sensibilium, si est aliquid universale ens per se. Et dixit hoc, quia apparet hic quod diffinitiones sunt de istis rebus sensibilibus existentibus extra intellectum, Et tunc aut non sunt res universales existentes per se, ut Plato dicebat, aut, si sunt, esse earum non est necessarium in intelligendo substantias rerum sensibilium. Et quasi dicit quod non curat in hoc loco quomodocunque sit, cum apparet quod iste diffinitiones non sunt nisi in rebus particularibus existentibus extra animam; sed quod apparet hic est quod aut non sunt omnino, aut, si sunt, postremum sunt; idest, sunt posteriores a rebus sensibilibus. Quoniam, si precederent eas, ita quod essent cause earum, non possemus intelligere substantias rerum sensibilium, nisi postquam habuissemus fidem sui esse; sicut est dispositio de aliis causis rerum existentibus in eis, scilicet forma et materia.

References in current editions

• F. S. CRAWFORD ed., Averrois Cordubensis Commentarium magnum in Aristotelis De Anima libros, The Mediaeval Academy of America, Cambridge, Massachusetts 1953., L. I, text. comm. 8, p. 12.21-43